فورۋم جۇمىسىنا رەسەيدەن, پولشادان, وزبەكستاننان جانە قازاقستاننىڭ وزگە وبلىستارىنان جينالعان ينۆەستورلار جانە قر ۇكىمەت مۇشەلەرى, ورتالىق مەملەكەتتىك ورگاندار مەن ديپلوماتيالىق كورپۋستار وكىلدەرى, وتاندىق جانە شەتەلدىك ساراپشىلار قاتىسۋدا.
ولار العاشقى كۇنى قوستاناي مەن رۋدنىي قالالارىنداعى ءىرى كاسىپورىندارىنا ۇيىمداستىرىلعان تۋرعا قاتىسىپ, ايگىلى سوكولوۆ-سارىباي كەن ءوندىرۋ بىرلەستىگىندە, «جاس قانات-2006» قۇس فابريكاسىندا, «بايان سۇلۋ» كونديتەر فابريكاسىندا, «سارىارقااۆتوپروم» ماشينا جاساۋ زاۋىتىندا, قوستاناي كارتينگ ورتالىعىندا, «نۇرلى جەر» باعدالاماسى بويىنشا سالىنىپ جاتقان شاعىن تۇرعىن اۋداندا بولدى. فورۋمدا سىرتتان كەلگەن بيزنەس وكىلدەرىنە قوستاناي وبلىسىنىڭ ينۆەستيتسيالىق قۋاتىن كورسەتۋ ماقسات ەتىپ قويىلدى.
ء«بىز ىرگەلەس ەل بولساق تا قوستاناي وبلىسىنىڭ ءوندىرىسىن كوزبەن كورمەگەن ەدىك. فورۋم ەندى وبلىس ونەركاسىبىمەن جەتە تانىسۋعا مۇمكىندىك بەردى. ەكى جاق ەڭ الدىمەن تاجىريبە الماسادى, بىرلەسىپ جۇمىس ىستەۋدى باستايدى. ءبىزدىڭ قوستانايلىقتارعا ءوز سالامىزدان, ياعني ەنەرگەتيكا سالاسىنان ۇسىنىستارىمىز بولادى», دەدى ەكاتەرينبۋرگتەن كەلگەن كاسىپكەر رۋسلان ستارينسكي.
«Kostanay Invest–2017» فورۋمىندا ەكونوميكانىڭ اۋىل شارۋاشىلىعى, كەنمەتاللۋرگيالىق, ماشينا جاساۋ جانە تۋريستىك ءتورت سالاسىنان قوستاناي وبلىسىنىڭ ينۆەستورلىق مۇمكىندىگى قارالادى.
«اۋىل شارۋاشىلىعى – فورۋمنىڭ وزەكتى تاقىرىبىنا اينالادى. قوستاناي وبلىسى – استىقتى ءوڭىر. «Kostanay-Invest 2017» فورۋمى الىس-جاقىن ەلدەردەن كەلگەن كاسىپكەرلەرمەن وبلىستىڭ ينۆەستيتسيا تارتۋ مۇمكىندىگى تۋرالى تالقىلايتىن بولامىز. جىل باسىنان بەرگى 8 ايدا ەكنوميكانى دامىتۋعا تارتقان ينۆەستيتسيا كولەمى الدىڭعى جىلدان 11 ميلليارد تەڭگەگە كوپ. بۇل وبلىستىڭ ينۆەستيتسيالىق قۋاتىن كورسەتەدى» دەدى قوستاناي وبلىسى اكىمىنىڭ ورىنباسارى مەيىرجان مىرزاليەۆ.
سونىمەن قاتار, فورۋمنىڭ العاشقى كۇنى رەسەيلىك Arman Holding كومپانياسىنىڭ نەگىزىن سالۋشى قانداسىمىز سەرىكباي بيسەكەەۆ ء«وزىڭدى ءوزىڭ جاسا» تاقىرىبىمەن اشىق شەبەرلىك ساباعىن وتكىزدى.
ءنازيرا جارىمبەت,
«ەگەمەن قازاقستان»
قوستاناي